స్నేహితుల దినోత్సవం
'స్నేహమేరా జీవితం... స్నేహమేరా శాశ్వతం..'
స్నేహానికి ఇంతకంటే గొప్ప నిర్వచనం ఏముంటుంది. గాడాంధకారం అలుముకున్నప్పుడు, నిరాశా నిస్పృహలు చుట్టుముట్టినపుడు..నీ కోసం నేనున్నానంటూ తట్టే ఆత్మీయ స్పర్శే స్నేహం. స్నేహం నిత్యనూతనం, నిత్య పరిమళం. ఎలాంటి అరమరికలు లేకుండా సంతోషాన్నయినా, విషాదాన్నయినా పంచుకునేది స్నేహితుల దగ్గరే. అందుకే అంటాడు వివేకానందుడు... 'శత్రువు ఒక్కడైనా ఎక్కువే... స్నేహితులు వందమంది అయినా తక్కువే' అని. మానవ సంబంధాలన్నీ ఆర్థిక బంధాలుగా మారిపోయి, మనిషన్నవాడు మాయమైపోతున్న తరుణంలోనూ ఇంకా ఆత్మీయమైన స్నేహాలు, ఉన్నతమైన మానవతా విలువలు వెలుగు రేఖలుగా దారి చూపుతూనే వున్నాయి. స్నేహమంటే ఒక నులివెచ్చటి స్పర్శ.
అలాంటి స్నేహానికి ప్రత్యేకంగా ఒక రోజు అవసరమా... అంటే అవసరమేనంటూ ప్రపంచ వ్యాప్తంగా ఒక రోజును నిర్ణయించుకొని స్నేహితుల దినోత్సవాన్ని ఒక వేడుకలా జరుపుకుంటున్నారు. అంతర్జాతీయ స్నేహితుల దినోత్సవాన్ని ప్రతి సంవత్సరం ఆగస్టు మొదటి ఆదివారం జరుపుకుంటారు. ఈ రోజున ప్రజలు తమ స్నేహితులపై ఉన్న తమ ప్రేమను వ్యక్తపరచడానికి తమ స్నేహితులతో గడుపుతారు. ఈ సందర్భంగా పువ్వులు, కార్డులు, మణికట్టు బ్యాండ్లు వంటి ఫ్రెండ్షిప్ డే బహుమతులు ఇచ్చిపుచ్చుకుంటారు, ఇదొక సాంప్రదాయంగా వస్తోంది. కార్పొరేటీకరణ నేపథ్యంలో ఈ సంప్రదాయన్నీ వ్యాపారమయం చేసేశారనుకోండి... అదే వేరే సంగతి. 1935లో యునైటెడ్ స్టేట్స్ కాంగ్రెస్ ఆగస్టు మొదటి ఆదివారాన్ని జాతీయ స్నేహితుల రోజు గా ప్రకటించింది. అప్పటి నుండి జాతీయ స్నేహితుల దినోత్సవం వార్షికోత్సవ వేడుకగా మారింది. ప్రపంచవ్యాప్తంగా అనేక ఇతర దేశాలు స్నేహితులకు ఒక రోజు అంకితమిచ్చే సంప్రదాయాన్ని స్వీకరించాయి. 1997 లో యునైటెడ్ నేషన్స్ \"స్నేహం\" యొక్క ప్రపంచ అంబాసిడర్ \"విన్నీ ది పూః\". నేడు స్నేహితుల దినోత్సవాన్ని అనేక దేశాలు ఉత్సాహవంతంగా జరుపుకుంటున్నాయి.
స్నేహితుల దినోత్సవం సందర్భంగా అందరికీ శుభాకాంక్షలు
